Dumating na sa bansa ang karagdagang 500,000 doses ng CoronaVac vaccine na binili ng national government mula sa Chinese firm na Sinovac Biotech.
Pasado 7:05 ng umaga nang lumapag sa Ninoy Aquino International Airport Terminal 2 ang Cebu Pacific chartered flight 5J671.
Mula sa paliparan ay dadalhin sa Pharmaserv cold storage facility sa Marikina City ang mga bakuna at saka ide-deliver sa local government units.
Ayon kay National Task Force Against COVID-19 Chief Implementer Carlito Galvez Jr. na siyang sumalubong sa Sinovac vaccines, isang milyong doses ang nakatakdang i-deliver sa National Capital Region (NCR) Plus, Luzon, Visayas, at Mindanao.
Dumating na rin kasi ang certificate of analysis o COA mula sa manufacturer para sa naunang 500,000 doses.
Umaasa naman si Galvez na sa May 7 ay mayroon pang darating na 1.5 million doses mula sa China habang posibleng sa May 1 na ang initial 15,000 doses ng Sputnik V mula sa Russia.
Batid ng opisyal na halos linggu-linggo ay may dumarating na bakuna sa bansa kaya kumpiyansa itong aabot na sa dalawang milyong Pilipino ang mababakunahan kontra COVID-19.