Ibinunyag ni Surigao del Sur Rep. Johnny Pimentel na magtatayo ang pamahalaan ng P450 Million seaport project sa Pag-asa Island, sa lalawigan ng Palawan.
Ang nasabing pondo ay nakapaloob na sa 2017 proposed national budget ayon kay Pimentel na kasapi ng House Committee on Appropriations.
Ang itatayong pier ay naglalayong palakasin ang daloy ng negosyo sa Palawan at patatagin ang posisyon ng bansa sa mga pinag-aagawang mga isla sa West Philippine Sea ayon pa sa mambabatas.
Ang naturang proyekto ay nauna nang ipinanukala ng Department of Transportation na nakapaloob kanilang P3.9 Billion spending program sa maritime sector para sa taong 2017.
Bukod sa seaport, magtatayo rin sa lugar ng research center ang Bureau of Fisheries and Aquatic Resources at ang Philippine Marine Science ng University of the Philippines.
Kasama rin sa plano ang pagtatayo ng Department of Energy ng 75-kilovolt-amp generator set para sa suplay ng kuryente sa kabuuan ng 37.2 ektaryang isla.
Taong 1978 ng pagtibayin ni dating Pangulong Ferdinand Marcos ang pagtatayo ng Pag-asa Municipality sa pamamagitan ng isang Presidential Decree.
Mula sa dating maliit na naval base ay marami ng mga sibilyan ang naninirahan sa naturang lugar na isa sa itinuturing na pinakamalaking isla sa Spratlys.
sourceDZIQ990AM