Hihilingin ni Senator Leila de Lima sa korte na payagan siyang maging bahagi ng impeachment court na didinig sa napipintong impeachment trial ni Chief Justice Maria Lourdes Sereno sa Senado.
Ayon kay de Lima, nagpapasalamat siya kay Senate President Aquilino Pimentel na nagsabing bilang isang sitting senator maaaring makasali si de Lima sa trial.
Ipinunto ni de Lima na bilang isang halal na senador, nakasaad sa Konstitusyon na maari siyang makibahagi sa mahahalagang proceedings sa Senado.
Tiniyak ni de Lima na ihahain ng kanyang mga abogado sa korte ang kaukulang mosyon para makasali siya sa impeachment trial sa tamang panahon.
Idinagdag din ni de Lima na bilang presidente ng Senado, alam ni Pimentel na kritikal na makasali ang minorya kabilang na siya sa isang sensitibo at maaring maging “game-changing” event sa kasaysayan ng bansa.
“I, therefore, hope for and anticipate the Senate President’s and the rest of my colleagues’ support for my participation therein, if and when the time comes,” ani de Lima.
Nauna ng sinabi ni Pimentel na kailangan ng boto ng 16 miyembro ng Senado para tuluyang mapatalsik si Sereno sa puwesto.
source: philstar